बेलबारीमा शुक्रबार बिहान तीनवटा सवारीसाधन एकापसमा ठोक्किँदा तीन जनाको मृत्यु भएको जिल्ला प्रहरी कार्यालय मोरङले जनाएको छ । पूर्व–पश्चिम राजमार्गको बेलबारी सडकखण्डमा टिपर, बस र जिप एक आपसमा ठोक्किँदा दुर्घटना भएको हो ।
साथै घटनामा दुई जना घाइते भएका छन् । प्रत्यक्षदर्शीका अनुसार टिपर सुरुमा जीपलाई ठक्कर दिनुअघि बससँग ठोक्किएको थियो । मृत्यु हुनेमा बिर्तामोड नगरपालिका–२ का ३६ वर्षीय जीप चालक, कमल गाउँपालिकाका ५१ वर्षीय पुरुष र ५० वर्षीया महिला रहेका छन् । घाइतेहरुको अहिले विराटनगरस्थित न्यूरो अस्पतालमा उपचार भइरहेको छ । दुर्घटनामा संलग्न मोरङका २३ वर्षीय टिपर चालक र उनका ४५ वर्षीय सहचालकलाई प्रहरीले नियन्त्रणमा लिएर थप अनुसन्धान गरिरहेको छ ।
